پیمرا کی جانب سے 11 پاکستانی مسیحی چینلز کی نشریات روکنے کا نوٹس

پاکستان الیکٹرانک میڈیا ریگولیٹری اتھارٹی (پیمرا) نے 11 مسیحی ٹی وی چینلز کی نشریات روکنے کا نوٹس جاری کیا ہے،نوٹس میں متعلقہ حکام کو جلد از جلد ایکشن لینے کا حکم دیا گیا ہے۔ نوٹس میں لکھا گیا ہے کہ رپورٹ کیا گیا ہے کہ درج ذیل غیر قانونی اور غیر لائسسنس یافتہ سیٹلائٹ ٹی وی چینلز کو کیبل ٹی وی نیٹ ورکس کی ذریعے ملک بھر میں نشر کیا جا رہا ہے۔

پیمرا کی جانب سے 11 مسیحی ٹی وی چینلز جن کا ذکر اس لسٹ میں کیا گیا ہے ان میں آئزک ٹی وی، گواہی ٹی وی، گاڈ بلیس ٹی وی، برکت ٹی وی، پریز ٹی وی، زندگی ٹی وی، شائن ٹی وی، جیزز ٹی وی، ہیلنگ ٹی وی، خوشخبری ٹی وی اور کیتھولک ٹی وی شامل ہیں۔ پیمرا کی جانب سے جاری کردہ نوٹس میں تمام متعلقہ حکام کو ہدایت کی ہے کہ ان ٹی وی چینلز کی غیرقانونی نشریات کیبل ٹی وی سے فوری طور پر ہٹا دی جائیں۔